Меценат Исламбек Салжанов еліміздің барлық қалалық және аудандық кітапханаларына инновациялық технология туралы 8 мың кітапты сыйға тартты, деп хабарлайды Kazinform.
Жиында «Қазақ тілі» халықаралық қоғамының президенті Рауан Кенжеханұлы, «Қазпошта» АҚ басқарма төрағасы Әсел Жанасова, Ұлттық академиялық кітапхананың директоры Ғазиза Нұрғалиева және Блокчейн технологиялары мен деректер орталықтары қауымдастығының басқарма төрағасы Дәурен Қарашев сөз сөйледі.
Шара барысында Исламбек Салжанов қазақ тілінің білім берудегі өзектілігіне тоқталып, кітаптарды қазақша аудару — еліміз үшін басты міндеттердің бірі екенін жеткізді.
Сондай-ақ, еліміздегі барлық қалалық және аудандық кітапханаларға 8 мың дана кітап тапсырылатынын хабарлады.
«Бүгін біз, Altyn Qyran Foundation, Қазақстан блокчейн технологиялары және деректер орталықтары қауымдастығы, „Қазақ тілі“ халықаралық қоғамымен, сондай-ақ Ұлттық академиялық кітапханамен және „Қазпошта“ АҚ-мен бірлесіп атқарған игі ісімізді бөліскіміз келеді. Қазақ тіліндегі жаңа технология туралы төрт әлемдік бестселлер еліміздің барлық қалалық және облыстық кітапханаларының сөрелеріне жіберіледі. Олар — „Блокчейн технологиясы“, „Ақшаның қысқаша тарихы“, „Криптовалюта дәуірі“ және „Ақиқат машинасы“. Бұл — ең қолжетімді және блокчейн технологиясы, криптоиндустрия, WEB3 қандай екені және прогресс қайда жатқаны туралы өте қызық 4 әлемдік кітап», — деді меценат.
Бұл кітаптардың бәрі онлайн форматта «Алтын қыран» қорының ресми сайтында тұр.
«Қазір біз өте күрделі кезеңде өмір сүріп жатырмыз. Бәрімізге блокчейн технологиясы, жасанды интеллект, заттар интернеті, кеңейтілген виртуалды шындық және т. б. жаңа технологияларды меңгеру керек. Ал болашақта оларға өзіміз де бір нәрсе қосуға тиіспіз. Бұл технологиялар әлі даму сатысында. Ал біз, қазақстандықтар, ең алдымен, жастар осы үдерістердің басы-қасында болуымыз керек. Бұл кітаптарды еліміздің барлық 168 аудандық кітапханасына жеткізу арқылы Қазақстанның ауыл жастарының жаһандық инновациялық білімге қол жеткізуіне мүмкіндік береміз. Кітаптар әр қазақстандыққа онлайн қолжетімді, бұл олардың инновациялық технологияларды меңгеруіне жол ашады», — деді спикер жастарға.
Сондай-ақ шарада Блокчейн технологиялары және дата орталықтары қауымдастығының басқарма төрағасы Дәурен Қарашев «Блокчейн, криптоиндустрия және Web3 дегеніміз не?» деген тақырыпта баяндама жасады.
«Блокчейн жаңа технология мен инновацияларды дамытуға айтарлықтай әсер етеді. Бүгінде жас кәсіпкерлер орталықтандырылмаған жобаларды құру, қаржылық инклюзияны жақсарту және білім, үкімет, энергетика, логистика, денсаулық сақтау және экономикамыздың басқа секторлары сияқты әртүрлі салалардағы ашықтықты арттыру үшін блокчейнді пайдаланып жүр», — деді ол.
Кітаптардың электронды нұсқасын мына сілтемеден жүктеп алуға болады:
Мақаланың түпнұсқасы: https://kaz.inform.kz/news/blokcheyn-turali-bestseller-ktaptar-algash-ret-kazak-tlnde-zharik-kord-4fca81/